As Illas Cíes forman un arquipélago situado na boca da Ria de Vigo, pertencente ás Rías Baixas na Provincia de Pontevedra, Glicia As illas pertencen ao concello de Vigo, e atópanse a 42º 15' de latitude norte, e a 8º 54' de latitude oeste. Foron declaradas parque natural en 1980, e están incluídas no Parque Nacional Marítimo-Terrestre das Illas Atlánticas de Galicia creado o 1 de xullo de 2002. Ademais, polas importantes colonias de aves mariñas, as Illas Cíes contan coa declaración de Zona de especial protección para Aves. Tamén son un Lugar de Importancia Comunitaria e mais Zona de Especial Protección dos Valores Naturais.
O arquipélago está formado por tres illas principais: a illa de Monteagudo (ou illa do Norte), a illa do Faro (ou Illa do Medio) e maila illa de San Martiño (ou illa do Sur), xunto a pequenos illotes como Boeiro ou Agoeiro, Viños, Carabelos e O Ruzo. Todas elas contan con 433 hectáreas terrestres de superficie, mentres que a superficie mariña protexida incluída no parque é de 2.658 hectáreas.
No ano 2007 un xornal británico elixiu a praia de rodas, na illa de Monteagudo, como a "praia máis fermosa do mundo".
A parte das praias o seu grande atractivo son os seus cantís e os denominados niños de abellas e as cacholas (cavidades redondeadas producidas na superficie das rochas que acaban fusionándose dando lugar a oquidades maiores).
